大路關老麵店

【文、圖／鍾榮富／南臺科技大學應用英語系講座教授】

 

　　對三地門行來，會先到新大路關(廣興村)，再過廣福大橋，一入河壩(舊大路關)，堵好一條岔路，右手片直接去泰山、高樹，左手片入村內社區中心。岔路中間，就係頭擺个麵店。頭家係安德先生，公婆兩儕共下打拚做生理，畜細人仔讀大學。平常時，頭家娘煮麵，老公擇菜、洗碗、招呼人客。早時農家人生活省儉，家家戶戶都自家煮食，會去食麵、買粄條个人，無係病人就係外客，故所生理冷冷淡淡。但係安德先生盡會泡茶，附近个老人家、閒人，輒輒圍等茶桌打嘴鼓。就恁呢，嘛係辛苦讓細人仔讀核大學。還好細人仔上進，成家立業後，接老人家去孝順，麵店就停業了。

　　麵店停業無幾久，堵好政府推廣社區營造、母語復振个計畫，當地个後生仔溫先生，在一表三千里个觀念之下，對外號稱阿姑委託，接手麵店个經營。後生仔有文化理念，知得行銷，先打出愛鄉土，愛保存地方特色个口號，同時積極號召地方人士，調查大路關个地方歷史、文化、同語言个源流，上網公布分享，爭取其他地方文史工作者个認同。無想到細細个店，經過文化行銷，馬上贏得後生个迴響。每擺放假，來自四面八方个人客，入店消費、打卡、翕像傳上網，分享心得。

　　當然麵店愛成功，不單只行銷重要，麵个味緒更加係關鍵。溫先生堅持用古法燒樵來煮麵，採用牛眼樹、荔枝樹做柴，燒起來空中濔漫了一種淡淡个清香。同時改進客家麵店又油又膩个缺點，改用正宗純正个豬骨、雞骨燉煮湯頭，排除浮啊在湯面个油波。麵條、粄條選材用心，煮法足滿講究，落水熝到七分熟，撈起來，加上豆菜(豆芽菜)、油蔥酥、豬肉片，再淋上高湯。讓歸碗麵看起來清白透明，晶瑩剔透，盡餳人食。

　　大路關麵店引起注意以後，生理越來越好。張家親戚就有人想來接手，溫先生只好到對面另外起屋。為了配合麵店个客家古老文化，屋壁採用紅磚原色，灶頭做啊同頭擺共樣，壁上掛等文化性个藝術品，逐季變化，有舊相片、有書法、有細人仔个圖畫等等，人客一看到就可以體會著客家文化个特殊性。店个空間實在無蓋大，但係感覺溫馨、有滿滿个客家風味。

　　溫先生个麵店本來無名仔，但係大家都知佢安到「大路關老麵店」。有興趣个人，可以上網google「大路關老麵店」，了解過多个資訊。


　　
（四縣腔） 鍾榮富教授 聲檔 － 大路關老麵店





　

▲BACK